ولاد البلد
بقلوب ملؤها المحبة
وأفئدة تنبض بالمودة
وكلمات تبحث عن روح الاخوة
نقول لكِ أهلا وسهلا
اهلا بكِ بقلوبنا قبل حروفنا
بكل سعادة وبكل عزة
ويسعدنا انك تنورنا فى المنتدى
&&&&&&&&&

قصة مكانش حلم الحلقة العاشرة

استعرض الموضوع السابق استعرض الموضوع التالي اذهب الى الأسفل

قصة مكانش حلم الحلقة العاشرة

مُساهمة من طرف Admin في الأربعاء يوليو 03, 2013 2:29 am

عماد شال ندى كريم قام و هو بيدعك فى عنيه

منى بلهفه : كريم ندى مبنطقتش خليك هنا متفتحش لحد

كريم اتخض لاول مرة على ندى

كريم بلهفه : طب اجى معاكم

منى على السلم : لا خليك هنا مش لسه هتلبس

دخل كريم و قفل الباب و لاول مرة يحس احساس غريب
حس اد ايه هو خايف يفقد ندى
رغم كلامهم القليل و المواقف الى جمعتهم الى خليتهم يشيلو من بعض

رغم انه حس انها فعلا اخته الى حته منه

حاول يرجع ينام معرفش حبه يقوم و حبه يفتح التليفزيون

لحد ما اخد قرار انه يدخل اوضتها

===============================

ندى فى العربيه نايمه على حِجر منى و عماد بيدمع من خوفه عليها

اسلام قاعد جنب عماد بيقرأ قرآن فى سرة كل شويه يبص عليها
احساسه بالذنب ان الى هى فيه هو السبب فيه مسيطر عليه

******************************

فـ المستشفى ،،،،

دكتور طالع من اوضه الاستقبال الى فيها ندى

عماد قام بسرعه و منى قامت و هى ماشيه ببطىء من تعبها و بتتسند على اسلام

الدكتور : الآشعه مبينه انها عندها كسر فى اعلى معصمها
هنضطر نجبس ايديها اليمين كلها

اسلام بخضه : عندها امتحانات يا دكتور مينفعش تتجبس

عماد بص للدكتور باهتمام انه يرود على سؤال اسلام

الدكتور : مافيش غير انها يـ تمتحن فى لجنه خاصه يـ نستنى بعد امتحانتها بس الكسر ممكن يحصلو مضاعفات و يجيبلها شلل

اسلام دموعه اتكونت فى عيونه و بيكرة نفسه كل ما يفتكر الوقعه الى وقعهالها اما زقها اد ايه كان قاسى عليها

الدكتور بيكمل كلامه : و نصيحه تعرضوها على دكتور نفسانى لانها مبتتكلمش

الكلمه نزلت ع الكل فى زهوول و اخصهم اسلام الى نفسه الزمن يرجع بيه بس ياريت الى راح بيرجع

كريم قاعد فى البيت حبه يقوم و حبه يفتح التليفزيون
مسك الموبايل اتكلم مع صحابه تضييع وقت لقى الصبح طلع
حاسس بفراغ كبير قال يدخل ينام

عدا من على اوضه ندى لقاها مفتوحه رجع وقف على الباب و دخل الاوضه

شايف فيها ندى و الحس الى عاملاه للبيت
حس اد ايه مكانها مهم و ان البيت وحش منغيرها

قعد ع السرير بص على سجادة الصلاة ابتسم قام لمس كتابها الى ع المكتب و رجع قعد ع السرير و هو فى ايدو كتاب من كتابها

ريح بضهرو على السرير و قبل ما يريح دماغه لمح دولابها مفتوح و جواة صندوق

فكر شويه ،، فلاش باااك

منى : قوم نادى على ندى يا كريم

كريم بياكل على الترابيزة الى فى المطبخ : متنادى عليها انتى يا ماما

منى : البطاطس هتتحرق عايزة اصلى يا زفت عشان تاخد بالها من الاكل

كريم قام على مضض الباب كان موارب

ندى اتخضت وقع منها الصندوق الى على رجلها

كريم : انتى يا بنتى الراعى الرسمى لخضتى فى البيت
الحاجه عايزاكى

ندى و هى بتلم الى وقع و بتحطه جوة الصندوق و بتحطه فى الدولاب : حاضر حااضر جايه

مشى كريم و هو بيبرطم

و فـ الوقت الحالى ،،

كريم ساب الكتاب عللى السرير و قام وقف قدام الدولاب و فتحه و طلع الصندوق

سمع تليفون البيت بيرن حط الصندوق مكانه و قال هيرجلعه تانى
طلع برة للريسيبشن بسربعه عشان يشوف مين الى بيتصل فى الوقت دا
كانت اول رنه خلصت و التليفون بطل يرن

لقى موبايله بيرن

رد اول ما شاف رقم غريب

كريم : الو ؟

منى : الو يا كريم ازيك يا حبيبى انت فين ؟؟

كريم : انا فى البيت يا ماما انتى الى كنتى بترنى على التليفون ؟

منى : اه الموبيلات كلها نسيناها فى البيت و انا بكلمك من المستشفى

كريم بلهفه : ندى عامله ايه ؟؟ طمنينى

منى : اطمن يا حبيبى ندى كويسه و هترجع معانا ان شاء الله

كريم : طيب الدكتور قالكو ايه ، يعنى كان فيها ايه اصلا ؟

منى : اما نيجى يا كريم المهم انتا متققلقش و اقفل الغاز و محبس الميه قبل ما تنزل درسك

كريم : حاضر يا ماما

منى : لا اله الا الله

كريم : محمد رسول الله

اتلهى كريم فى الطلبات الى طلبتها منه منى و نسى انه يرجع تانى للصندوق
قفل انوار الشقه واخد شنطته بص فى الساعه لقى ان لسه بدرى اوى على درسه
ظبط موبايله و غلبه النوم

منى قاعدة جنب ندى على سريرها فى البيت و بتعملها كمادات ميا دافيه و رابطلها كتفها برباط ضاغط
بعد ما دهنتلها المرهم و بتدعى ربنا انها تقوم بالسلامه

صعبان عليها منظر ندى اوى

دخل عماد و فى ايدو صينيه اكل

ندى نفسيتها وجعاها اكتر من وجعها الجسدى من ظلم اسلام ليها

اسلام متجاهل ندى تماما لانه خايف يواجهها و مش عارف يصلح الى عمله ازاى

ندى كل ساعه تعدى و اسلام مش بيكلمها تحس كأن تعبها بيزيد مكنتش تتخيل ا ندا اسلام و انه ممكن يعاملها كدا فى يوم من الايام

عماد قرب على ندى باسها من جبينها

عماد : قومى كلى يا حبيبتى

ندى شاورت بإيديها : ماليش نفس
عماد : لا عشان خاطر ماما و بابا لتاكلى

الكلمه وجعت ندى نزلت دموعها على باباها و مامتها الحقيقين و انهم لو كانو موجودين مكنتش اتبهدلت كدا

قامت ندى و اتعدلت و ابتدت تستسلم لعماد و هو بيأكلها

منى : طب انا هقوم اغير هدومى و اريح جوة شويه عشان تعبت اوى

عماد : طيب انا هفضل جنبها لحد ما تروح فى النوم روحى انتى ارتاحى

منى : ماشى " و بصت على ندى " عاوزة حاجه يا ندى ؟

ندى هزت دماغها : لا

عماد بيأكل ندى باب الاوضه مفتوح

اسلام باصص بطرف عينه من على حرف الباب يدوبك مدخل راسه و دموعه مش مبطله على منظر ندى
قلبه مش مطاوعه يفضل ميكلمهاش و فى نفس الوقت مش عارف يقولها ايه

عماد : يا ندى اتكلمى قولى اى حاجه ،، ايه الى مزعلك ،، طب وقعتى ازاى ،، طب فى ايه ؟

محاولات عماد فى ان ندى تتكلم باءت كلها بالفشل

ندى عملت نفسها نايمه ،، غطاها عماد و قفل النور و ملس على شعرها

اسلام شافه و هو طالع بعد عن اوضتها طلع عماد و قفل الباب وراة

قامت ندى طلعت صورة باباها و مامتها من السلسله الى شايلاها جوة الصندوق
و رجعت ع السرير و قعدت تعيط فى صمت

بصت ندى جوة الصندوق شافت الورقه الى كتبهالها عمر
مسحت دموعها و كأنها لاول مرة بتقرأ الى فى الورقه

قعدت تفكر و اترسمت على وشها ابتسامه من الموقف خدت الورقه والسلسله فى حضنها و فردت البطانيه عليها و نامت

==================================

كل يوم يعدى كان محمد بيتعلق بـ ريتاج
و ريتاج بتتعلق بمحمد اكتر

محمد حاسس احساس العيله و مش فاكر اى حاجه من ايام زمان

هدى مكانتش مشجعه قُرب ريتاج من محمد ( سيف )

هدى بتطبق الغسيل جنب رشدى فى الاوضه

رشدى : مالك يا هدى ؟

هدى كأنها كانت مستنيه سؤال رشدى قعدت جنبه فى حيرة

كرر رشدى السؤال : مالك يا هدى ؟؟

هدى : بص يا رشدى انا مش حابه قُرب ريتاج من سيف كدا

رشدى باستغراب : بس دا اخوها مش حابه ايه

هدى بمقاطعه حادة : لا مش اخوها انتا هتكدب الكدبه و تصدقها

رشدى فاق من احلامه : انا اقصد يا هدى انه عارف انها اخته

هدى : بس متنساش ان قُربهم دا غلط و ان البنت مسيرها هتكبر و هيتحول لحاجه حرام انه حتى يمسك ايديها

رشدى بحيرة : و ايه المطلوب ؟

هدى : يا تسفرة يكمل تعليمه يـ يأما توديه مدرسه داخليه

رشدى عجبته الفكرة : بس يا هدى الولد محتاجنا

هدى : و انا محتاجه بنتى كفايه سيف الى مات

رشدى بعصبيه : مش كل شويه تفكرينى ياشيخه ارحمى بقى

هدى : انا اسفه و الله ما اقصد انا اقصدى

رشدى قطعها و هو بيقوم يلبس : انا هنزل اسأل على مدرسه داخليه كويسه الامتحانات ع الابواب
يدوبك الحق اخلص ورقه عشان اسلمهوله فى الاجازة

==============================================
فريدة واقفه مع امل فى المطبخ بتناولها سكينه عشان تقطع السلطه

امل : مالك يا فيرى ؟

فريدة شدت كرسى و هى بتقعد : اقولك ع حاجه يا ماما بس مش تزعلى ؟

امل سابت الى فى ايدها و بصت لها باهتمام : مالك يا فريدة ؟

فريدة : انا ندى وحشتنى اوووى نفسى اشوفها كنت اتمنى انى افضل فى الدار و اعيش مع ذكرياتى هناك معاها ولا انى مشوفهاش خالص

امل صعبت عليها فريدة شاورتلها تيجى فى حضنها
قامت فريدة و حضنت امل و قعدت على رجلها

امل : طب و الى يخليكى تشوفى ندى ؟؟

فريدة بفرحه : بجد يا ماما ؟؟

امل : بجد يا روح و قلب ماما انا هكلم مشرفه الدار هى بتحبنى اووى و كان ودها تمشى بس للاسف مافيش شغل و عيالها هيتشحططوا
هخليها تجيبلى عنوان خاله ندى من نسخه ملفها الى هناك

فريدة : ربنا يخليكى ليا يا احلى ام فى الدنيا

امل : و يخليكى ليا يا احلى بنت فى الدنيا
ريحه المكرونه

امل قامت تجرى هى و فريدة

فريدة بضحك على المكرونه الى اتحرقت : الحب ولع فى الدرة

امل و فريدة : هههههههههههههههههههههههههههه

================

عدت ايام الامتحانات
كريم و ندى خلصوا امتحانات و ابتدت امتحانات اسلام

كل يوم يعدى اسلام مكانش عارف ازاى يواجه ندى مش قادر يبص حتى فى عينها ولا قادر يواجهها لانه هو السبب فى كل الى حصلها

*************

عماد جه من الشغل بيغير هدومه

منى بتعلق اللبس ع الشماعه

منى : احنا هنفضل ساكتين على قله كلامها كدا يا عماد ؟

عماد بيقفل زراير البيجامه : مين الى قالك انى ساكت ،، انا عرفت ان فى دكتور كويس اوووى استشارى امراض نفسيه و عصبيه
و كنت مستنى بعد امتحانتها عشان الضغط النفسى ميزيدش اكتر عليها

منى : دكتور نعرفه ؟؟ فى انهى مستشفى ؟؟

عماد : انا ممكن اكون شفته قبل كدا بس معرفهوش اسما ،، هو كل الى اعرفه انه اسمه رشدى عبد العظيم شحاته
avatar
Admin
Admin

المساهمات : 54
تاريخ التسجيل : 02/07/2013
العمر : 21
الموقع : egypt

معاينة صفحة البيانات الشخصي للعضو http://wladelbalad.ahlamontada.org

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى